नाबालिकाको गोपनीयता संरक्षणमा जीतपुरसिमरा उपमहानगरपालिकाको अपिल

जीतपुरसिमरा उपमहानगरपालिकाले हालैको घटनासँग सम्बन्धित एक नाबालिकाको गोपनीयता र हितलाई मध्यनजर गर्दै सामाजिक सञ्जालमा फोटो, भिडियो र पोस्टहरू सार्वजनिक नगर्न नगरबासीलाई अनुरोध गरेको छ।

असोज १६ गते राति करिब ११ बजे जीतपुरसिमरा उपमहानगरपालिका–७, मगर टोलमा एक नाबालिक बालिका अज्ञात व्यक्तिहरूद्वारा सडकमा अलपत्र अवस्थामा फेला परेकी थिइन्। उक्त घटना सार्वजनिक भएपछि बालिकालाई तत्काल उद्धार गरी हाल उपमहानगरपालिकाको प्रत्यक्ष निगरानीमा राखिएको छ।

बालिकाको अस्थायी संरक्षण जननिर्वाचित न्यायिक समिति सदस्य सिता उप्रेतीको मातहतमा रहेको उपमहानगरपालिकाले जनाएको छ।

बालिकाको सर्वोत्तम हित र गोपनीयता कायम राख्ने उद्देश्यले सामाजिक सञ्जालमा बालिकासँग सम्बन्धित कुनै पनि पोस्ट, फोटो वा भिडियो सार्वजनिक नगर्नुका साथै सार्वजनिक भइसकेका सामग्रीहरूमा लाइक, कमेन्ट वा सेयर समेत नगर्नु हुन अनुरोध गरिएको छ।

उपमहानगरपालिकाको तर्फबाट बाल कल्याण अधिकारी दुर्गा न्यौपानेको हस्ताक्षरसहित जारी सार्वजनिक अपिलमा नगरबासी तथा सामाजिक सञ्जाल प्रयोगकर्ताहरूप्रति जिम्मेवार रहन आग्रह गरिएको छ।