विश्वकप यात्राबाट बाहिरिएपछि कप्तान कोहलीले के भने ?

विश्वकप क्रिकेट २०१९ को सेमिफाइनलमा न्युजिल्याण्डसँग भारत पराजित भएपछि त्यसको चर्चा सर्वत्र छ । विशेष गरी भारतीय सञ्चार माध्यम यो प्रतियोगिताबाट भारत बाहिरिएपछि भारतीय टोलीलाई हौसला प्रदान गर्ने र आलोचना गर्ने क्रम पनि जारी छ । बुधबारको पहिलो सेमिफाइनलमा भारतलाई १८ रनले पराजित गर्दै न्यूजिल्याण्ड फाइनलमा प्रवेश गरेको छ।

आफ्नो टोली सेमिफाइनलबाटै आउट भएपछि भारतीय कप्तान विराट कोहलीले न्यूजिल्याण्डका बलरहरूको प्रंशसा गरेका छन्। शुरूवाती ४० देखि ४५ मिनेटको समयमा खेलको दिशा परिवर्तन भएको उनको भनाइ छ। कोहलीका अनुसार न्यूजिल्याण्डको शानदार बलिङका कारण भारतीय टोली दबावमा आयो र गल्ती गर्न बाध्य हुन पुग्यो।

यद्यपि सबै खेलमा भारतीय टोलीले राम्रो प्रदर्शन गरेको उनको तर्क छ। खेलपछि पत्रकारहरूको जिज्ञासामा कोहलीले भने, “हामी पराजयबाट निराश पक्कै भएका छौँ, तर हाम्रो आत्मविश्वास धरमराएको छैन।” न्यूजिल्याण्डको बलिङको खुलेर प्रशंसा गर्दै उनले भने, “केही प्रहार पक्कै राम्ररा थिएनन्, तर रोहित राम्रो बलमा आउट भए। म पनि राम्रै बलमा आउट भएँ।”