भ्रष्टाचारको आरोपमा क्रिकेटर शोहेलीलाई ५ वर्ष प्रतिबन्ध
ए वान डेस्क
अन्तर्राष्ट्रिय क्रिकेट काउन्सिल (आईसीसी) ले भ्रष्टाचारको आरोपमा बङ्गलादेशकी क्रिकेटर शोहेली अख्तरलाई ५ वर्षको प्रतिबन्ध लगाएको छ ।
शोहेली अख्तर भ्रष्टाचारको आरोपमा प्रतिबन्धमा पर्ने पहिलो महिला क्रिकेटर बनेकी छिन् ।
३६ वर्षीया अख्तरमाथि खेलमा मिलेमतोको प्रयास गरेको, आर्थिक अनियमिततामा संलग्न रहेको र स्वतन्त्र अनुसन्धानमा असहयोग गरेको आरोप लागेको थियो ।
भ्रष्टाचार विरोधी संहिताको पाँच प्रावधान उल्लङ्घन गरेको स्वीकार गरेपछि अख्तरलाई आईसीसीले सबैखाले क्रिकेटबाट पाँच वर्षको प्रतिबन्ध लगाएको हो ।
गएको वर्ष दक्षिण अफ्रिकामा भएको महिला टी–२० विश्वकप क्रिकेटका क्रममा अख्तरले खेलमा मिलेमतो गरेको आरोप लागेको थियो ।
उनले त्यो विश्वकप नखेले पनि खेल मिलेमतोमा संलग्न रहेको पाइएको थियो ।
अस्ट्रेलियासँगको खेलमा उनले खेलाडीलाई ‘हिट विकेट’ आउट हुनका लागि १६ हजार ४ सय अमेरिकी डलरको प्रस्ताव गरेकी थिइन् ।
शोहेली अख्तरले बङ्गलादेशका लागि दुई अन्तर्राष्ट्रिय एकदिवसीय र १३ टी–२० अन्तर्राष्ट्रिय क्रिकेट खेलेकी छिन् ।
ताजा खबर
