सिमराका डिभिजन बन प्रमुख सहित दुई कर्मचारी अख्तियारको नियन्त्रणमा

बाराको सिमरास्थित डिभिजन बन कार्यालयमा अख्तियारले आज छापा मारेको छ । अख्तियारको टोलीले एक लाख पन्ध्र हजार रुपैया घुस सहित बन कार्यालयका प्रमुख सहित दुई कर्मचारीलाई रगेंहात पक्राउ गरेको हो ।

डिभिजन बन कार्यालय बाराका प्रमुख शिवशंकर ठाकुर र अर्का सहायक बन अधिकृत गौरीशंकर केशरीलाई अख्तियारको टोलीले नियन्त्रणमा लिएको छ । सेवाग्राही संग डिभिजन बन प्रमुख ठाकुरले लिएको ९० हजार र अर्का केशरीले लिएका २५ हजार सहित दुबै अख्तियारले नियन्त्रणमा लिएको छ ।

डिभिजन प्रमुख ठाकुरले कार्यालय सहयोगी मार्फत रकम लिन लगाएको अख्तियार स्रोतले जानकारी दिएको छ ।

सेवाग्राहीसँग घुस लिएर हैरान बनाएको उजुरी परेपछि प्रहरी नायव उपरीक्षक केशव भट्टराईको नेतृत्वमा अख्तियारको टोली बारा आइपुगेको हो। घुस प्रकरणको विषयमा थप अनुसन्धान भइरहेको अख्तियारको टोलीले बताएको छ।